Иннополиста Ватанны саклаучыларга стела ачтылар һәм алма бакчасы утырттылар
Югары Осланда һәм Иннополиста Бөек Җиңүнең 80 еллыгына багышланган истәлекле чаралар быел беренче мәртәбә шундый масштабта узды. Югары технологияләр шәһәрендә Ватанны саклаучыларга стела – үткән һәм хәзерге геройлар турындагы истәлекнең яңа символын ачу тантанасы булды.
Тантанада Татарстан премьер-министры урынбасары Роман Шәйхетдинов һәм Югары Ослан районы башлыгы Евгений Варакин катнашты. Иннополис – киләчәк шәһәре, әмма ул тарих һәм традицияләр белән элемтәне саклый. Истәлек билгесен ачу Туган илне яклаучыларның батырлыгын мәңгеләштерүдә мөһим адым булды.
Җиңүнең 80 еллыгы уңаеннан алма бакчасы – 80 агач утырту да аеруча зур әһәмияткә ия булды. Стела янына утыртылган яшь үсентеләр буыннар дәвамчанлыгын һәм имин киләчәккә өмет символы булып тора. Бу яшел почмак шәһәр халкы һәм кунаклары өчен истәлек һәм уйлану урыны булачак.
Бөек датага багышланган тантаналар кичке вакытта Югары Осланда бәйрәм чаралары белән тәмамланачак.
Бүген Россиядә Бөек Ватан сугышында Җиңүнең 80 еллыгы билгеләп үтелә. Шулай ук РФ Президенты Владимир Путин карары нигезендә 2025 ел Ватанны саклаучылар елы дип игълан ителде. Татарстан Рәисе Рөстәм Миңнеханов Җиңүнең 80 еллыгы уңаеннан котлавында билгеләп үткәнчә, җиңүчеләрнең дәвамчылары елдан-ел сугыш турындагы истәлеккә тугрылыгын саклавын дәвам итә.
Материал Сергей Толмацкий катнашында әзерләнде.
Фото: Югары Ослан районының матбугат хезмәте.