Казан кешесенә автобуста битлексез һәм белешмәләрсез барганы өчен беркетмә төзелгән

Бүген полицейскийлар җәмәгать транспорты пассажирларының саклагыч медицина битлекләре киеп йөрүләрен тикшерде.

(Казан, 30 апрель, «Татар-информ», Елена Сәлахова). Казанда яшәүче бер кешегә автобуста медицина битлеге, өйдән чыгу өчен белешмәсе һәм СМС-пропускы булмаганы өчен беркетмә төзелгән.

Тикшерү буенча рейдны бүген тәртип сакчылары Киров дамбасында оештырды.

10нчы маршрут автобусында полицейскийлар битлексез булган ир-атка игътибар иткән. Моннан тыш, үзе белән өйдән чыгу өчен белешмәсе дә, СМС-пропускы да булмавы ачыкланды.

«Эштә миңа бернинди белешмәләр дә бирмәделәр. Мин нинди дә булса рөхсәтләр кирәклеген белми идем», - дип акланырга тырышты ир-ат.

Патруль машинасында хокук бозучыны полиция бүлегенә алып киттеләр, анда аңа административ беркетмә төзеләчәк. Хәзер үз-үзеңне изоляцияләү режимын үтәмәгән өчен аңа 30 мең сумга кадәр штраф яный.