Хәвеф-хәтәр 30 гыйнвар 2020 12:45

Чаллы автовокзалында автобус шоферы үлгән

Рейска чыгар алдыннан ул сәламәтлегенә зарланмаган һәм үзен яхшы хис иткән.

Скопировать ссылку

(Чаллы, 30 гыйнвар, «Татар-информ», Эльвира Мөхәммәтдинова). Чаллы автовокзалында планлаштырылган тукталыш вакытында Уфа – Түбән Новгород маршруты буенча хәрәкәт итүче транзит автобусы шоферы үлгән. Фаҗига булган урынга «Башавтотранс» дәүләт унитар предприятиесе вәкилләре юл тоткан.

«Башавтотранс» дәүләт унитар предприятиесеннән хәбәр итүләренчә, әлегә автобус йөртүченең ни сәбәпле үлүе ачыкланмаган.

Бары тик автобусның 29 гыйнварда көндез Уфаның Южный автовокзалыннан Түбән Новгородка юл тотуы гына билгеле. Автобуска ике шофер, шул исәптән 42 яшьлек Геннадий Яикбаев хезмәт күрсәткән. Ул 17.30 сәгатьтә рульдә Чаллы автовокзалына килеп туктаган һәм биредә кинәт хәле начарайган. Автовокзал хезмәткәрләре ашыгыч ярдәм чакырткан. Табиблар аның үлүен раслаган.

«Башавтотранс» дәүләт унитар предприятиесе җитәкчелеге әйтүенчә, Геннадий Яикбаев рейска чыгар алдыннан медицина тикшерүе узган, сәламәтлегенә зарланмаган, үзен яхшы хис иткән.

«Пассажирларны икенче автобус белән озаттылар. Әлеге хәлне тикшерү дәвам итә», - дип белдерде предприятие вәкиле.

Сәхифәләр

Чаллы автовокзалында автобус шоферы үлгән