Түбән Камада KIА автомобиле светофорның кызыл утына чыккан һәм ике баланы бәрдергән

Аларның икесе дә төрле тән җәрәхәтләре алган.

(Казан, 29 июль, «Татар-информ», Полина Шевчук). Кичә кичке дүртенчеләр киткәч Түбән Кама шәһәрендә KIА автомобиле ике баланы бәрдергән.

Машина белән 52 яшьлек ир-ат идарә итә. Ул Сөембикә урамындагы 61нче йорт каршында, светофорның кызыл утына чыгып, 9 һәм 10 яшьлек ике баланы бәрдергән. Бу хакта «Татар-информ» агентлыгына Түбән Кама Дәүләт автоинспекциясенең пропаганда бүлегеннән хәбәр иттеләр.

Нәтиҗәдә, 10 яшьлек баланың кулы сынган, аяк-куллары һәм башы җәрәхәтләнгән. Аны Түбән Кама шәһәр балалар хастаханәсенә озатканнар. 9 яшьлек баланың ияге, шулай ук аяк-куллары яраланган. Аны да хастаханәгә китергәннәр һәм табиблар караганнан өенә кайтарып җибәргәннәр.