Татарстанда завод бинасындагы янгыннан ике эшчене коткарганнар
Түбән Камада чыккан янгынның мәйданы 60 квадрат метр тәшкил иткән.
(Казан, 28 гыйнвар,«Татар-информ»). Татарстанда завод бинасындагы янгыннан ике эшчене коткарганнар, алар бинада ремонт ясый торган булган.
«Татар-информ»га Россия Гадәттән тыш хәлләр министрлыгының ТР буенча Баш идарәсенең матбугат хезмәтендә хәбәр итүләренчә, бүген 13.45 сәгатьтә 101нче янгын сагы номерына Түбән Камада «Камэнергопромстрой» заводында янгын чыгуы турында хәбәр килгән.
Бинаның беренче катында пенопластка ут капкан. Адрес буенча килгән янгын сүндерүчеләр бинада көчле төтен күргән. Янгыннан ремонт ясаган ике эшчене коткарганнар.
Якынча мәгълүматларга караганда, янгын мәйданы 60 квадрат метр тәшкил иткән.