Татарстан юлында чит ил машинасы янган, шоферына зыян килмәгән

Янгын автомобиль системалары һәм механизмнары төзек булмау аркасында килеп чыккан.

(Казан, 27 ноябрь, «Татар-информ»). Татарстан трассасында чит ил машинасы янган, шофер исән калган. Бу хакта Россия Гадәттән тыш хәлләр министрлыгының ТР буенча Баш идарәсе матбугат хезмәтендә сөйләделәр.

Бүген көндезге сәгать берләр тирәсендә ашыгыч хезмәтләрне бердәм чакыру 112 номерына трассада машина януы турында хәбәр алынган. Янгын хәрәкәт иткән вакытта мотор бүлегендә килеп чыккан.

Янгын сүндерүчеләр урынга килеп, янгынны сүндергән. Фаҗига автомобиль системалары һәм механизмнары төзек булмау аркасында килеп чыккан.

Машина йөртүче зыян күрмәгән, янгын сүндерүчеләр килгән вакытта ул машина янында булган. Автомобиль салоны тулысынча янып беткән.