Әлмәт районында юл-транспорт һәлакәтендә 13 яшьлек кыз үлгән

Авария кичә кич Әлмәттән Тихоновка бистәсе ягына чыккан юлда була.

(Казан, 27 октябрь, "Татар-информ"). Әлмәт районында юл һәлакәтендә 13 яшьлек кыз һәлак булган, дип хәбәр итә "Вести KAMAZа".

Кичә кич Әлмәттән Тихоновка бистәсе ягына чыккан юлда 10нчы модель "Лада" машинасы йөртүчесе, үзен узып китәргә маташкан автомобильгә карап, “Камаз”га килеп керә. "КамАЗ" аның алдыннан барган була. Авария аркасында җиңел машина йөртүченең 13 яшьлек кызы алган җәрәхәтләрдән шунда ук һәлак була. Ул алгы урындыкта утырып барган була.