Татарстанның бер авылында өлкән яшьтәге хатын-кыз янгын корбаны булган

Фаҗига кичә кичке сәгать җиделәрдә республиканың Әлмәт районы Ямаш авылында килеп чыккан.

(Казан, 22 ноябрь, «Татар-информ», Полина Шевчук). Татарстанда авылда өлкән яшьтәге хатын-кыз янгын корбаны булган. Бу хакта «Татар-информ»га ТР буенча Россия Гадәттән тыш хәлләр министрлыгы Баш идарәсе матбугат хезмәтендә сөйләделәр.

Кичә 19.19 сәгатьтә  ашыгыч хезмәтләрне бердәм чакыру 112 номерына республиканың Әлмәт районы Ямаш авылында Совет урамында кечкенә генә агач йорт януы турында хәбәр килгән.

166нчы янгын сүндерү часте хезмәткәрләре янгынны сүндергәч, йортта 86 яшьлек хатын-кыз гәүдәсен тапкан.

Әби кешенең кыш көне улы янында яшәгәне һәм өенә сирәк кайтканы билгеле.

Фаҗиганең сәбәпләре ачыклана.