Чистайда юл һәлакәтендә зыян күрүчеләр саны 12гә җиткән

Юл-транспорт һәлакәте кичә кич Александровка бистәсе янында булган.

(Казан, 22 октябрь, "Татар-информ"). Татарстанда Чистай районында булган юл-транспорт һәлакәтендә 12 кеше зыян күргән, дип хәбәр итә Татарстан Сәламәтлек саклау министрлыгы матбугат хезмәте.

Искәртеп үтик, “Татар-информ” Александровка бистәсе янында Удмуртия номерлары белән булган “Сетра” туристик автобусы юл кырыена төшеп киткәнлеген хәбәр иткән иде. Автобуста туристлар Самарадан Сарапулга кайта торган булган.

Юл-транспорт һәлакәте аркасында12 кеше хастаханәгә озатылган. Автобус йөртүчесе Чистай үзәк хастаханәсенә авыр хәлдә китерелгән, дүрт пассажирның хәле уртача авырлыкта, җидесенең хәле канәгатьләнерлек. Тагын алты зыян күрүче хастаханәгә барудан баш тарткан.