9 айда Татарстан юлларында 23 баланың гомере өзелгән

(Казан, 22 октябрь, «Татар-информ», Наталья Рыбакова). Агымдагы елның 9 аенда балалар катнашында 464 юл-транспорт һәлакәте теркәлгән. Аварияләр нәтиҗәсендә 23 баланың гомере өзелгән, 476 бала төрле дәрәҗәдәге җәрәхәтләр алган.
Бу хакта бүген ТР ЮХИДИ башлыгы Рифкать Миңнеханов республика Дәүләт автоинспекциясенең агымдагы елның 9 ае эш нәтиҗәләре буенча узган киңәшмәдә белдерде. Узган ел белән чагыштырганда агымдагы елда баллалар һәм яшүсмерләр катнашындагы юл-транспорт һәлакәтләре саны 15,1 процентка арткан, җәрәхәтләнүчеләр – 18,1 процентка.
Юл-транспорт һәлакәтендә зыян күргән балаларның 248нә 7-14 яшь, яки 53,5 процент икәнлеген билгеләп үтәргә кирәк. Юл һәлакәтләрендә шулай ук 7 яшькәчә 132 бала (28,5 процент) һәм 14-16 яшьлек 106 бала (22,8 процент) зыян күргән.
Рифкать Миңнеханов сүзләренчә, узган чорда республикада автотранспорт чараларында балаларны утыртып йөртү куркынычсызлыгы кагыйдәләрен бозуның 40 меңнән артык очрагы ачыкланган.