Нурлат районында шәхси йортта чыккан янгында ике кеше үлгән

Янгын Якушкино авылының Мәктәп урамындагы 25нче йортта чыккан.

(Казан, 20 октябрь, "Татар-информ"). Нурлат районында шәхси йортта хатын-кыз һәм ир-ат янып үлгән. Бу хакта “Татар-информ” агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтеннән хәбәр иттеләр.

Янгын кичә кич Якушкино авылының Мәктәп урамындагы 25нче йортта чыккан.

Урынга “ Агроразвитие”, Сөләйман авылы, 125нче часть янгын сүндерүчеләре килгән. Аларны күршеләре каршылаган һәм эчтә хуҗа калганын җиткергән.
Ут капкан йорт һәм сарайны 27 минутта сүндергәннәр. Янгын калдыкларын актарганда 50 яшьлек ир-ат һәм 59 яшьлек хатын-кызның янган мәетләре табылган.

Йорт һәм сарай тулысынча янган, тулаем янгын мәйданы 80 квадрат метрны тәшкил иткән.

Янгынның беренчел сәбәпләре – тәмәке тартканда саксыз булу.