Татарстанда исерек хатын-кыз идарә иткән машина агачка килеп бәрелгән

(Казан, 20 апрель, «Татар-информ», Наталия Никифорова). Татарстанда исерек хатын-кыз идарә иткән «Опель Монтерей» автомобиле агачка барып бәрелгән. Бу хакта «Татар-информ»га Чаллыда үз хәбәрчесе хәбәр итте.

Бүген төнлә республиканың Тукай районындагы Яңа (Новый) бистәсендә  Үзәк урамдагы 10нчы йорт янында «Опель Монтерей» автомобиле агачка барып бәрелгән. Юл-патруль хезмәте инспекторлары мәгълүматларына караганда, исерек килеш руль артына утырган шушында яшәүче 36 яшьлек хатын-кыз машина белән идарә иткән.

Юл-транспорт һәлакәтендә машина йөртүче үзе зыян күргән — аның башы җәрәхәтләнгән. Шулай ук  42 яшьлек пассажир хатын-кыз җәрәхәт алган, аны хастаханәгә озатканнар.

«Һәлакәт факты буенча административ тикшерү үткәрелә, нәтиҗәдә гаепле затка карата тиешле административ чаралар күреләчәк», — дип хәбәр итте агентлыкка Россия Эчке эшләр министрлыгының Тукай районы буенча ЮХИДИ бүлеге башлыгы Шамил Ганиев.