Башкортстанның атказанган артисты Римма Дашкина вафат булган

Римма Дашкина җырчылар Радик Гәрәев, Нәзифә Кадыйрова, Идрис Газиев һ.б. белән бергә эшләгән.

(Казан, 20 февраль, «Татар-информ»). Башкортстанның атказанган артисты, Башкорт дәүләт филармониясе хезмәткәре Римма Госман кызы Дашкина Уфада 76 яшендә вафат булган.

Бу хакта «Башинформ» агентлыгы Башкортстан Мәдәният министрлыгына сылтама белән хәбәр итә.

Уфа сәнгать училищесының театр бүлеген тәмамлаганнан соң, ул Башкорт дәүләт филармониясендә эшли – Фәйзи Гаскәров исемендәге Дәүләт академия халык бию ансамбленең әйдәп баручы биючесе була, биюче карьерасын төгәлләгәннән соң нәфис сүз жанрына күчә.

Римма Дашкина эстрадада Радик Гәрәев, Нәзифә Кадыйрова, Идрис Газиев һ.б. танылган җырчылар белән бергә эшли.