Кыска ялганыш аркасында Казанда «Мега» сәүдә үзәгеннән 1200 кеше эвакуацияләнде

Балалар мәйданчыгында яктырткыч плафонында кыска ялганыш булган.

(Казан, 19 февраль, «Татар-информ»). «Мега» сәүдә үзәгеннән кыска ялганыш аркасында Казанда 1200 кеше эвакуацияләнде. Бу хакта «Татар-информ» мәгълүмат агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.

Бүген 11.00 сәгатьтә гадәттән тыш хәлләр министрлыгына Җиңү проспектындагы сәүдә комплексында авария янгын сигнализациясе, шулай ук эвакуация белән идарә итү системасы эшләве турында хәбәр килде. Шунда ук Казан гарнизоны янгын сүндерүчеләре килеп җитте.

Сәүдә үзәге администрациясе 1200 кешене эвакуацияләде.

Бинада Yu Kids Island балалар мәйданчыгында яктырткыч плафонында кыска ялганыш булган, янгын чыкмаган.