Янгын сүндерүчеләр Казанда ут капкан фатирдан аңын югалткан ир-атны алып чыккан

Бүген кич бишенче яртылар тирәсендә Җиңү проспекты урамындагы 174нче йортның бишенче катында янгын чыккан.

(Казан, 18 гыйнвар, «Татар-информ»). Янгын сүндерүчеләр Казанда ут капкан фатирдан аңын югалткан ир-атны алып чыккан.

«Бүген 16.24 сәгатьтә 101нче янгын сагы чакыру номерына Җиңү проспекты урамындагы 174нче йортта янгын чыгуы турында хәбәр килде», - дип сөйләделәр «Татар-информ»га ТР буенча Россия Гадәттән тыш хәлләр министрлыгы Баш идарәсе матбугат хезмәтендә.

Урында бишенче каттагы фатир януы ачыкланган.

Торак эчендә аңсыз ир-ат табылган. Зыян күрүчене урамга алып чыгып, ашыгыч ярдәм табибларына тапшырганнар. Алар 65 яшьлек ир-атны тикшергәч, 7нче шәһәр хастаханәсенә озаткан.

16.59 сәгатьтә мәйданы 10 квадрат метр тәшкил иткән янгын сүндерелгән. Ут чыгу сәбәпләре билгеләнә.