Казан суды «Татфондбанк» кертемчеләрен яклап җибәрелгән 180 дәгъваны канәгатьләндергән

(Казан, 17 октябрь, «Татар-информ»). Татарстанның район һәм шәһәр прокурорлары «Татфондбанк»ның зыян күргән кертемчеләре хокукын торгызу буенча эш алып бара, дип хәбәр итте республика прокурорының өлкән ярдәмчесе Руслан Галиев.

Хәзерге вакытта Казанның Вахитов районы судына кертемчеләрне яклап 256 дәгъва җибәрелгән, шуларның 180ен суд канәгатьләндергән.

Дәгъваларның 73ен суд кире каккан, шуларның 66сына прокурорлар аппеляция тәртибендә ризасызлык белдергән: 44е - Татарстан Югары судының гражданлык эшләре буенча Суд коллегиясе тарафыннан тикшерелгән һәм канәгатьләндерелгән, 9ы - шул ук банктан башка кертемнәр буенча гражданнарга иминиятләштерү акчаларын кире кайтаруга сылтама белән кире кагылган, 13е - әле каралмаган.

Әлеге өлкәдә прокурорларның эше дәвам итә.