Татарстанда ике җиңел автомобиль бәрелешкәннән соң өч кеше имгәнгән

Авария кичә кичке алтылар тирәсендә Званка авылы янында булган.

(Казан, 17 гыйнвар, «Татар-информ», Полина Шевчук). Татарстанда ике җиңел автомобиль кара-каршы бәрелешкәч, бер ир-ат һәм ике яшүсмер зыян күргән. Бу хакта «Татар-информ» агентлыгына әлеге аварияне күргән кешеләр хәбәр итте.

Кичә кичке алтылар тирәсендә Званка авылы янында, «Царево» торак комплексына җитәрәк, «Рено» һәм «ДЭУ» автомобильләре юлны бүлешә алмаган.

Нәтиҗәдә, ике машина да юл читенә төшеп киткән.

«Авариядә ким дигәндә өч кеше зыян күргән — ике шофер һәм „ДЭУ“ автомобилендәге пассажир. „Рено“ ның йөртүчесе — 40 яшьләр тирәсендәге ир-ат. Корея автомобилендә яшүсмерләр барган, аларга 17-18 яшьләр тирәсе», — дип искәртте авариянең шаһитлары.