Татарстан Арбитраж судында Рәшит Сәлахов белән хушлашу мәрасиме башланды
Россия һәм Татарстанның атказанган юристы 14 февральдә 80нче яшендә вафат булды.
(Казан, 15 февраль, «Татар-информ»). Казанда ТР Арбитраж судының элеккеге рәисе Рәшит Сәлахов белән хушлашу мәрасиме башланды. Хушлашу чарасы Татарстан Арбитраж суды бинасында уза.
«Рәшит Ислам улы – авыр язмышка ия кеше, аңа күпне кичерергә туры килгән. Шуңа да карамастан, ул югары профессионал, киң күңелле кеше булып калды, сүзе белән дә, гамәлләре белән дә ярдәмгә килергә әзер иде», - дип аның турында хис-кичерешләре белән уртаклашты ТР Арбитраж суды рәисе урынбасары Олег Логинов.
Шунысын да искәртик: Россия һәм Татарстанның атказанган юристы Рәшит Сәлахов 2021 елның 14 февралендә 80нче яшендә вафат булды. Татарстан Президенты Рөстәм Миңнеханов та аның вафатына бәйле мәрхүмнең туганнары һәм якыннарының кайгысын уртаклашты.