Янгын сүндерүчеләр Алексеевск районы басуында янган үләнне сүндергәннәр

Ут төртүдә гаепле кешеләрне полиция эзләячәк.

(Казан, 13 сентябрь, «Татар-информ»). Янгын сүндерүчеләр Татарстанның Алексеевск районы басуында янган үләнне сүндергәннәр. Бу хакта «Татар-информ» агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәте хәбәр итте.

Янгын Лебедино авылы янындагы кырда иртәнге сәгать тугызда чыга, 300 к.метр мәйданда камыл һәм салам калдыклары яна.

Янгында зыян күрүчеләр юк, ләкин кыр тулысынча янып беткән.

Ут төртүдә гаепле кешеләрне полиция эзләячәк. Аңа 2 меңнән 200 мең сумга кадәр штраф яный.