Хәвеф-хәтәр 13 июль 2020 19:41

Мишә елгасында 15 яшьлек үсмер батып үлгән, судан коткарырга кергән әтисен эзлиләр

Яшүсмер бата башлый, ә әтисе аны коткарырга ташлана, тик аларның икесе дә елгадан чыкмаган.

Скопировать ссылку

(Казан, 13 июль, «Татар-информ»). Татарстанда Мишә елгасында 15 яшьлек үсмер батып үлгән, коткаручылар хәзер аның әтисен эзли. Бу хакта «Татар-информ»га ТР буенча Россия Гадәттән тыш хәлләр министрлыгы Баш идарәсенең матбугат хезмәтендә хәбәр иттеләр.

Республиканың Питрәч районындагы «Алмагач» бакчачылык җәмгыяте янында фаҗига кичә кич килеп чыккан. Хәбәр 112 системасы буенча алынган.

Ачыкланганча, кичке сәгать тугызынчы киткәч 49 яшьлек ир-ат һәм аның ике улы су коенырга киткән. Бераздан кече улы өенә кайта һәм абыйсы бата башлаганын, ә әтисе аны коткарырга ташлануын, тик аларның икесенең дә судан чыкмавын әйтә.

Иртән 6.55 сәгатьтә коткаручылар яшүсмернең мәетен табып судан чыгарган. Хәзерге вакытта 2нче зона коткару отряды водолазлары малайларның әтисен эзләүләрен дәвам итә.

Сәхифәләр

Мишә елгасында 15 яшьлек үсмер батып үлгән, судан коткарырга кергән әтисен эзлиләр