Татарстанда бер яшьлек бала салкында өшегән, ул бик авыр хәлдә

Сабыйны реанимобильдә Республика балалар клиник хастаханәсенә алып киләләр.

(Казан, 13 гыйнвар, «Татар-информ», Эвелина Киселёва). Татарстанда бер яшьлек сабый бик нык өшегән. Бу хакта «Татар-информ» мәгълүмат агентлыгында узган матбугат конференциясендә Республика балалар клиник хастаханәсенең 2нче балалар хирургия бүлеге табибы Владимир Линьков сөйләде.

«Хәзер Республика балалар клиник хастаханәсенә безнең бригада бик авыр хәлдәге баланы алып килә», - диде табиб.

Өшегән сабыйның дүрт яшьлек апасы Алексеевск үзәк хастаханәсендә, аның бармакларына зыян килгән. Табиблар аның хәлен уртача авырлыкта дип бәяли.

Балаларның имгәнү сәбәбен хокук саклау органы хезмәткәрләре ачыклаячак.