Чирмешән хастаханәсе машиналары яңартыла
Тиздән район үзәк больницасына әле тагын бер яңа машина кайтырга тиеш.
Скопировать ссылку
(Казан, 12 сентябрь, "Татар-информ", "Безнең Чирмешән", Марат Гомәров). Чирмешән район үзәк хастаханәсенә өр-яңа “Форд-Транзит” автомашинасы кайтты. “Ашыгыч ярдәм” хезмәте өчен ул бик ипле, кирәкле транспорт, ди белгечләр. Бу хакта район газетасы яза.
"Бүген иртән Урманасты Үтәмештән авыр хәлдәге пациентны алып килдек. “Ашыгыч ярдәм”нең иске машинасы юлда ватылган, ярый әле авыруны китереп җиткерә алды. Кеше гомере бит, монда яхшы, ышанычлы техника кирәк", - ди район үзәк хастаханәсе баш табибының хуҗалык эшләре буенча урынбасары Рафик Хәйдәров.
Рафик Габдрахман улы әйтүенчә, “Ашыгыч ярдәм”нең өч машинасы да “картлар”, 9-11 еллыклар. Шуның өчен яңа “Форд” бик вакытлы кайткан. Яңа машинаны республикадан биргәннәр, әле номерлары да алмаган.
"Бу машинада, искитмәле, эш өчен нәрсә кирәк – барысы да бар. Планшетына кадәр куйганнар. Бу - эшне ансатлаштыра, мисал өчен, машинадагы ЭКГ аппаратына төшереп, без мәгълүматларны шунда ук Интернет аша табибларга җибәрә алабыз. Димәк, авыруга тиешле беренче ярдәмне тизрәк күрсәтергә була", - ди “Ашыгыч ярдәм” хезмәте фельдшеры Пелагея Квакова.
Тиздән район үзәк больницасына әле тагын бер яңа машина кайтырга тиеш, диелә хәбәрдә.
