Өлкән яшьтәге хатын-кыз көчле агымлы елгага егылып төшкән

Коткаручылар Әлмәттә яшәүче хатын-кызны аңсыз хәлдә егылган урыннан 250 метр ераклыкта табып алган.

(Казан, 12 август, «Татар-информ», Полина Шевчук). Татарстанда өлкән яшьтәге хатын-кыз көчле агымлы елгага егылып төшкән, чак үлми калган. Бу хакта «Татар-информ»га ТР буенча Россия Гадәттән тыш хәлләр министрлыгы Баш идарәсе матбугат хезмәтендә сөйләделәр.

Бүген 11.20 сәгатьтә ашыгыч хезмәтләрне бердәм чакыру 112 номерына Әлмәттә Зәй елгасына 72 яшьлек хатын-кыз егылып төшүе турында хәбәр алынган. Көчле агым пенсионер ханымны ярдан бик тиз алып киткән.

Чакыру буенча килгән коткаручылар егылган урыныннан 250 метр ераклыкта өлкән яшьтәге аңсыз әбине көймәдә ярга алып чыккан. 

Табиблар пенсионерны аңга китергән һәм шуннан соң аны хастаханәгә илткән.