Чаллыда биш катлы йортта янгын чыккан, фатир хуҗасын хастаханәгә озатканнар
Янгын ГЭС бистәсенең Муса Җәлил проспектындагы торак йортта чыккан.
(Казан, 12 апрель, «Татар-информ», Павел Климчак). Чаллының ГЭС бистәсендә Муса Җәлил проспектындагы бер торак йортта янгын чыккан.
Россия Гадәттән тыш хәлләр министрлыгының ТР буенча Баш идарәсе матбугат хезмәтендә «Татар-информ» агентлыгына белдерүләренчә, шул хактагы хәбәр 101 янгын сагы номерына бүген иртән килгән. Бишенче катта урнашкан бер фатирның аш бүлмәсенә ут капкан. Ут белән көрәшүчеләр 61 яшьлек ир-атны урамга алып чыккан. Берничә минуттан соң янгынны сүндергәннәр. Аның мәйданы 4 квадрат метр тәшкил иткән.
Яну продуктлары белән агуланган фатир хуҗасын шәһәр хастаханәсенә озатканнар. Хәзерге вакытта янгынның сәбәпләре ачыклана.