Мишустин Казан мәктәбендәге атышта һәлак булучыларның туганнары кайгысын уртаклашты

Казанның 175нче гимназиясендәге атыш вакытында сигез кеше һәлак булган, 21 кеше хастаханәгә озатылган.

(Казан, 11 май, «Татар-информ»). Россия Хөкүмәте Рәисе Михаил Мишустин вице-премьерлар катнашындагы киңәшмәдә Казанның 175нче гимназиясендә балаларга һөҗүм вакытында һәлак булучыларның туганнары һәм якыннарының кайгысын уртаклашты.

«Хөрмәтле коллегалар, киңәшмәне Казандагы фаҗигадә һәлак булучыларның туганнары һәм якыннарының кайгысын уртаклашу сүзләре белән башлыйсым килә. Белгәнегезчә, бүген иртән бер мәктәптә зур фаҗига булды, биредә балаларга аттылар. Бу бернинди кысаларга да сыймый торган кансызлык һәм рәхимсезлек», - диде РФ Премьер-министры, киңәшмәне ачып.

«Мәктәп укучылары һәм бер укытучы һәлак булды, бу – бик зур кайгы», - дип өстәде Мишустин.

Шуннан соң киңәшмәдә катнашучылар һәлак булучыларны бер минут тынлык белән искә алды.

Соңгы мәгълүматлар буенча, Казанның 175нче гимназиясендәге атыш вакытында сигез кеше һәлак булган, 21 кеше хастаханәгә озатылган.