Казандагы бер автосервиста зур янгын чыккан

(Казан, 10 май, “Татар-информ”). Казанның Родина урамындагы автосервиста җитди янгын булган. Бу хакта “Татар-информ”га Татарстан Гадәттән тыш хәлләр министрлыгының матбугат хезмәтендә хәбәр иттеләр.

“Узган төндә 3:03 сәгатьтә экстрен хезмәтләр чакыру өчен 112 бердәм номерына, Родина урамы 20а адресы буенча урнашкан автосервисның мансард өлеше һәм җиһазлары яну турында хәбәр килде”, - диделәр матбугат хезмәтендә.

Янгынның мәйданы 220 квадрат метр булган. Янгында беркем дә зыян күрмәгән. Ут чыгуның беренчел сәбәбе электр җиһазларын кулллану кагыйдәләрен бозу дип фаразлана.