Казанда шәхси йортта янгын чыккан, зыян күрүчеләр юк
Янгын электр җиһазын эксплуатацияләү кагыйдәләрен бозу сәбәпле чыккан дип фаразлана.
(Казан, 9 апрель, «Татар-информ», Полина Шевчук). Казанда шәхси йортта янгын чыккан, зыян күрүчеләр юк. Социаль челтәрләрдән файдаланучылар интернетта шул хакта видеоролик урнаштырды.
Россия Гадәттән тыш хәлләр министрлыгының ТР буенча Баш идарәсе матбугат хезмәтеннән «Татар-информ» агентлыгына хәбәр итүләренчә, Лагерная урамындагы шәхси йортта янгын чыгуы турындагы хәбәр 112 бердәм номерына кичә 22.57 сәгатьтә килгән.
Урынга 4нче янгын-коткару часте хезмәткәрләре юл тоткан. Янгын сүндерүчеләрне каршы алган хуҗалар өйдә беркем дә булмавын әйткән. Бу вакытта ялкын телләре агач йортны һәм башка каралтыларны ялмап алган була инде.
23.30 сәгатьтә янгынны тулысынча сүндергәннәр. Аның мәйданы 91 квадрат метр тәшкил иткән. Янгында беркем дә зыян күрмәгән.
Янгын электр җиһазын эксплуатацияләү кагыйдәләрен бозу сәбәпле чыккан дип фаразлана.