Казанда автобус йөртүчеләргә рейд вакытында таксист перчатка кимәгән хәлдә эләккән
Автоинспекторлар Аккош күле янында шәһәрара автобус һәм такси йөртүчеләренә тикшерү оештырган.
(Казан, 8 июль, «Татар-информ», Елена Сәлахова). Шәһәрара автобус йөртүчеләргә рейд вакытында ЮХИДИ хезмәткәрләре таксистны перчаткасыз хәлдә тоткан.
Иртән Аккош күле янында автоинспекторлар тоталь тикшерү оештырган. Алар пассажир транспортын йөртүчеләрнең документларына һәм юл хәрәкәте кагыйдәләрен үтәүгә генә түгел, ә Казанда яшәүчеләрнең битлек-перчатка режимын саклауларына да игътибар итте.
Тикшерү вакытында полицейскийлар такси машинасын туктаткан, шофер руль артында перчаткасыз утырган булган.
«Эсседә көне буе аларны киеп эшләп булмый», – дип акланган таксист.
Ир-атка карата административ беркетмә төзелде. Хәзер аңа штраф яный.