Татарстанда Covid-19 инфекциясе белән авыручы бишенче кеше вафат булды
Тәүлек эчендә республикада коронавирус белән зарарлануның 83 яңа очрагы ачыкланган, 44 кеше сәламәтләнгән һәм хастаханәдән чыккан.
(Казан, 8 май, «Татар-информ», Алексей Угаров). Татарстанда пациентның коронавирус инфекциясеннән үлүенең бишенче очрагы расланды. Бу хакта «Татар-информ»га ТР Президенты матбугат хезмәте җитәкчесе Лилия Галимова хәбәр итте.
Ул 1938 елда туган һәм Түбән Кама районында яшәүче кеше булган. «Бу кеше 1 майда ютәлгә, хәлсезлеккә һәм югары температура булуга зарланган һәм аны хастаханәгә салганнар», - диде Галимова.
Өлкән яшьтәге ир-ат Түбән Кама хастаханәсенең йогышлы авырулар бүлегендә дәвалана. Анда ике яклы полисегментар пневмония һәм көчле респиратор дистресс-синдромы катлаулана, яңа коронавирус инфекциясенең авыр формасы була.
4 майдан башлап пациент үпкәләрне ясалма җилләтү (ИВЛ) аппаратына тоташтырылган. Аңарда үпкәләренең хроник обструктив авыруы һәм шикәр диабеты булган.
Узган тәүлектә Татарстанда Covid-19ның 83 яңа очрагы ачыкланган, 44 кеше сәламәтләнгән һәм хастаханәдән чыккан.