Казанда һәлакәттә түбәсенә әйләнеп капланган машина йөртүчесе хастаханәгә озатылган

Һәлакәт бүген иртәнге җидедә Горький шоссесында булган.

(Казан, 7 май, «Татар-информ», Полина Шевчук). Казанда 2 автомобиль белән булган юл-транспорт һәлакәтеннән соң машиналарның берсе түбәсенә әйләнеп капланган. Авто йөртүчесе хастаханәгә озатылган. Бу хакта «Татар-информ»га шәһәр автоинспекциясендә сөйләделәр.

Бүген Горький шоссесында 6.50 сәгатьтә «ДЭУ Матиз» һәм «ДЭУ Нексия» катнашында юл-транспорт һәлакәте булган. Һәлакәттә «ДЭУ Матиз» түбәсенә әйләнеп капланган.

«Авариядә «ДЭУ Матиз»ның 56 яшьлек шоферы зыян күргән. Ябык баш мие җәрәхәте булган ир-атны хастаханәгә китерделәр», - дип аңлаттылар ЮХИДИдә.

Авария аркасында Казанга керү юлында җитди бөке барлыкка килгән.