Әлмәт районында трассада җиңел машина "КАМАЗ" астына кергән

Рус Акташы авылы янында "Ниссан Тиана" автомобиле "КАМАЗ" йөк машинасы белән бәрелешкән.

(Казан, 6 ноябрь, «Татар-информ»). 6 ноябрьдә 18 сәгать 32 минутта Әлмәт районында, Әлмәт - Чаллы автомобиль юлының 26 нчы чакрымында юл-транспорт һәлакәте була: Рус Акташы авылы янында ике машина бәрелешә.

Социаль челтәрләрдә "Ниссан Тиана" автомобиле "КАМАЗ" йөк машинасы белән бәрелешүен хәбәр итәләр. Шаһитлар белдегәнчә, чит ил машинасының руленда утырган кеше идарәне югалтып, шул вакытта борылышта тизлеген киметкән йөк машинасы астына кергән. Җиңел автомобильгә зур зыян килгән, машина йөртүче исән калган. Аны күпсанлы җәрәхәтләр белән хастаханәгә озатканнар.