Татарстанда җиңел машина һәм почта фургоны бәрелешеп, өч кеше зыян күргән
Авария бүген иртәнге сәгать бишләр тирәсендә Сокура торак пункты янында булган.
(Казан, 5 август, «Татар-информ», Полина Шевчук). Татарстанда җиңел машина һәм почта фургоны бәрелешкән юл-транспорт һәлакәтендә өч кеше зыян күргән. Бу хакта «Татар-информ»га авария шаһитлары сөйләде.
Бүген иртәнге бишенче яртыларда Сокура авылы янындагы Мишә елгасы аша салынган күпердә авария булган. Биредә Самара номерлары булган «Шевроле» җиңел автомобиле һәм «Россия Почтасы»ның «Форд» фургоны капма-каршы бәрелешкән.
«Өч ир-ат зыян күрде. Минем аңлавымча, барысы да җиңел автомобильдән. Аяк һәм корсак авыртуларына зарландылар. Ашыгыч ярдәм медиклары барысын да хастаханәгә алып китте», - дип сөйләде агентлыкка юл-транспорт шаһитлары.
