Казан фатирларының берсендә краннан су белән бергә терекөмеш аккан

Чәйнектә вак пыяла калдыклары табылган

  (Казан, 5 май, «Татар-информ»). 4 майда Казанның Авиатөзелеш районында Чапаев урамында урнашкан 17 нче йорттагы фатирларның берсендә, хуҗалар чәйнеккә су тутырганда, краннан су белән бергә терекөмеш шариклары чыгуын күреп алганнар.
Кичә 21.25 сәгатьтә бу хакта ТР Гражданнар оборонасы эшләре һәм гадәттән тыш хәлләр министрлыгына хәбәр килгән.
Коткаручыларның кизү сменасы һәм ЭЭМ хезмәткәрләре чәйнектә вак пыяла ватыклары булуын ачыклаган, алар градусниктан булырга мөмкин.
Шулай ук ЭЭМ хезмәткәрләре чүп чиләгендә ватылган градусник тапкан, тикшерү бара. Балалар шаяруы сәбәп булган, дип фаразлана.
Водоканал хезмәткәрләре анализ ясау өчен су үрнәген алган. Зыян күрүчеләр юк.