Татарстанда чит ил автомобиле юлдан читкә төшеп киткән һәм әйләнеп капланган

Авария Питрәч районының Шихазда авылында булган.

(Казан, 4 октябрь, «Татар-информ»). Татарстанның Питрәч районында чит ил автомобиле юлдан читкә төшеп киткән һәм әйләнеп капланган, авариядә машинаның исерек йөртүчесе зыян күргән. Бу хакта «Татар-информ» агентлыгына әлеге юл һәлакәтен күргән кешеләр хәбәр итте.

Автомобиль Шихазда авылының Шоссе урамында юлдан читкә төшеп киткән. Машина белән идарә итүче егерме яшьләрдәге егет исерек булган.

«Тизлекне ничек арттырганын сизми калгандыр, мөгаен. Нәтиҗәдә, үзе дә имгәнде, машинаны да харап итте», - диде шаһитлар.

Ашыгыч ярдәм табиблары егетне хастаханәгә алып киткән.