Казанда Арбузов исемендәге фәнни-тикшеренү институтында төтен чыккан

Гражданнар оборонасы эшләре һәм гадәттән тыш хәлләр министрлыгы хезмәткәрләре электрощит бүлмәсендә кыска ялганыш булуын ачыклаган.

(Казан, 3 ноябрь, «Татар-информ»). Бүген Казанның Арбузов исемендәге органик һәм физик химия фәнни-тикшеренү институтында төтен чыкты, дип хәбәр иттеләр “Татар-информ”га Россия Гадәтән тыш хәлләр министрлыгының ТР буенча Баш идарәсе матбугат хезмәтендә.

Бүген 17.15 сәгатьтә ашыгыч хезмәтнең 112  бердәм номерына Арбузов урамындагы 8 йортта төтен чыгуы турында хәбәр килгән. Янгын урынына 6нчы янгын-коткару часте хезмәткәрләре барган. Алар барлык бүлмәләрне тикшереп чыккач, электрощит бүлмәсендә кыска ялганыш булуын ачыклаган.

Коткаручылар гадәттән тыш хәл аркасында килеп чыккан зыянны тиз арада хәл иткән.