Төрле төбәкләрдә 26 әбине үтерүдә шикләнелә торган Казан кешесен кулга алдылар
Казан, Уфа, Самара, Үзәк, Идел буе һәм Урал төбәкләрендә хатын-кызларны үтереп йөрүче кешене җиде елдан артык эзләгәннәр.
(Казан, 2 декабрь, «Татар-информ», Елена Сәләхова). Казанның Совет районы суды 38 яшьлек Радик Таһировны кулга алды. Казан, Уфа, Самара, Үзәк, Идел буе һәм Урал федераль округының башка шәһәрләрендә яшәүче өлкән яшьтәге 26 хатын-кыз аның корбаны булган.
Үтерү очраклары Казанда 2011-2013 елларда теркәлә. Ир-ат социаль хезмәткәр яки слесарь буларак таныштырып, пенсионерларның фатирына кергән, аларны буып үтергән һәм кыйммәтле әйберләрен алып чыгып киткән.
Әбиләрне үтерүдә шикләнелә торган ир-атны җиде елдан артык эзләгәннәр. Тоткарланганчы ул слесарь булып эшләгән, хатыны белән ике малай үстергән.
Радик Таһиров судтан өй арестына җибәрүләрен сорады һәм наркотик матдә йогынтысында үтерүен таныды.
Суд үтерүчене 27 гыйнварга кадәр Тикшерү изоляторына җибәрде. Радик Таһировның гаебе исбатланган очракта, аны гомерлеккә төрмәгә утыртачаклар.