Татарстанда янгында ике кеше үлгән
Янгында 50 яшьлек ир-ат зыян күргән. Ул янгын турында хәбәр итүче җайланма тавышын ишетеп, йорттан үзе чыккан.
(Казан, 1 июль, «Татар-информ»). Татарстанда төнлә чыккан янгында ике кеше үлгән. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.
Бүген 2:00 сәгатьтә ашыгыч хезмәтнең 112 бердәм номерына республиканың Биектау районы Бимәр авылында янгын турында хәбәр килгән. Бер катлы кирпеч йорт янган.
Янгын сүндерү вакытында 113нче янгын сүндерү-коткару часте хезмәткәрләре 57 яшьлек ир-атның каты янган мәетен тапкан.
Янган корылмаларны тикшергәндә коткаручылар 83 яшьлек хатын-кызның мәете тапкан. Янгында 50 яшьлек ир-ат зыян күргән. Ул янгын турында хәбәр итүче җайланма тавышын ишетеп, йорттан үзе чыккан. Ир-ат хастаханәгә барудан баш тарткан.
Бу йортка янгын турында хәбәр итә торган корылманы узган кышта администрация куйдырткан.
Янгын 81 квадрат метрга зыян китергән.
