Имам Илнар Зиннәтуллин хатын-кызларны чын ирләр тәрбияләргә чакырды
Казанда икенче көн Бөтендөнья татар хатын-кызлары съезды бара.
(Казан, 18 апрель, «Татар-информ», Рузилә Мөхәммәтова). Бүген II Бөтендөнья татар хатын-кызлары съездының пленар утырышында “Туган авылым” мәчете имамы Илнар Зиннәтуллин чын ирләр тәрбияләүдә хатын-кызның зур роле турында вәгазь сөйләде.
Хәзрәт сүзен съездда яулыклы хатын-кызларның азрак булуына борчылу белдерүдән башлады. “Мөселман хатын-кызының төп бизәге яулык. Биредә яулыклар азрак. Киләсе җыелышларда яулыкларны күбрәк күрербез дип ышанасы килә”, - диде ул.
“Хатын-кыз үз урынын тапса, бу җәмгыятьне үзгәртергә бер буын җитә. Бозар өчен дә хатын-кыз җитә. Бер бозык хатын-кыз мең бозык иргә торыр. Хатын-кыздан “Чын ирләр юк” дигән сүзне ишетергә туры килә. Чын ирләрне тәрбияләргә кирәк. Аны кем тәрбияли? Хатын-кыз. Өйдә әти кешегә хөрмәтне дә әни тәрбияли. Хатын-кыз “Атагыз слабак” дисә, бала шулай дип үсәчәк”, - диде “Туган авылым” мәчете имамы Илнар Зиннәтуллин.
“Гаилә – җәмгыятьнең нигезе. Хатын-кыз үзен өйдә утырталар дип кимсенмәсен. Бала тәрбияләү – иң зур вазифа. Бу зур савап. Ирнең тынычлыгы да – хатын-кызда”, - дип тәмамлады ул чыгышын.
Казанда икенче көн Бөтендөнья татар хатын-кызлары съезды бара. Бүген аның пленар утырышы булды.