Ильяс Галимов исемендәге махсус премиягә Кукмара көрәшчесе лаек булды
30 мең сумлык премия финал алышларында иң матур алым ясаучыга бирелә.
(Минзәлә, 13 февраль, «Татар-информ», Энҗе Габдуллина). Муса Җәлил истәлегенә багышлап «Ватаным Татарстан» гамәлгә куйган көрәш турнирында Кукмара көрәшчесе Илсур Гимадутдинов Ильяс Галимов исемендәге махсус премиягә ия булды. Аңа 30 мең күләмендә акчалата бүләк тапшырдылар.
Илсур Гимадутдинов 60 кг үлчәү авырлыгында чемпион да калды. Ул финалда Раббани Нургалиевтан өстен чыкты. «Премиягә ия булырмын дип башыма да килмәде. Горурланам, бик зур рәхмәт», — диде ул «Татар-информ» хәбәрчесенә.
Танылган көрәшче Ильяс Галимов исемендәге премияне булдыру — 58 тапкыр уздырыла торган турнирның быелгы яңалыгы. Әлеге премия финал алышларында иң матур алым ясаучыга бирелә.
Ачылыш тантанасында «Ватаным Татарстан» газетасының баш мөхәррире Гөлнара Сабирова бу премияне ел саен уздырылачак дип белдергән иде. «Ильяс Галимов истәлегенә премия булдыруны федерациядә хупладылар. Марат Готыф улы аны ел саен премия итте», — диде ул.