Илсур Метшин укытучыларга ташламалы торак арендасы программасын булдырырга тәкъдим итте
Быел Казанның М-14 микрорайонында 70 педагог социаль ипотека программасы буенча фатир алган.
Казан мэры Илсур Метшин Татарстанда укытучыларга ташламалы торак арендасы һәм даими эшли торган социаль ипотека программасын булдыруны тәкъдим итте.
Илсур Метшин әлеге тәкъдимен республика җитәкчелегенә мәгариф һәм фән хезмәткәрләренең республика август киңәшмәсендә җиткерде.
Быел Казанның М-14 микрорайонында 70 педагог социаль ипотека программасы буенча фатир алган. Шәһәр башлыгы әлеге эштә ярдәм иткәне өчен Татарстан Рәисе Рөстәм Миңнехановка рәхмәт әйтте.
«Сыйфатлы белем бирү өчен инфраструктура кирәк, ләкин балаларны стеналар гына укытмавын, интерактив такталар һәм нейрочелтәрләр тәрбияләмәвен танырга кирәк. Балаларны яраткан, аларның талантын үстерүгә мотивациясе булган педагоглар тәрбияли һәм укыта. Мин шәһәр һәм республика педагогларына рәхмәт әйтәм», – диде Илсур Метшин.
