Җәмгыять 5 февраль 2024 15:39

Илсур Метшин: «Буран» планы тәмамланды, әмма буран гына бу хакта белми

Скопировать ссылку

Буран Татарстан башкаласы коммуналь хезмәтләренең ныклыгын сынауны дәвам итә. Казан мэры Илсур Метшин эшлекле дүшәмбе киңәшмәсендә шулай дип белдерде. Бу турыда «Татар-информ» хәбәрчесе Александра Давыдова яза.

«Узган атнада «Буран» планы тәмамланды, әмма буран гына бу хакта белми, кар явуын дәвам итә. Ялларда да, кичә дә шактый актив явым-төшем күзәтелде. Әлбәттә, ике атна элеккеге кебек үк актив түгел, шуңа да карамастан кар коммуналь хезмәтләр, юл эшчеләренең ныклыгын сынауны дәвам итә», - дип искәртте Метшин.

Башкарма комитет җитәкчесе урынбасары Игорь Куляжев искәрткәнчә, 1 гыйнвардан Татарстан башкаласында 84 миллиметр күләмендә явым-төшем күзәтелгән, бу норманың 182 проценты дигән сүз. Шул исәптән кыска гына чорда, 17-22 гыйнварда 49 миллиметр күләмендә кар яуган, бу – айлык норма. Шушы вакыт эчендә шәһәр урамнарыннан 638 мең тонна – тәүлегенә 37 мең тонна – кар чыгарылган. Моннан тыш, бозлавыкка каршы 12,5 мең тонна материал кулланылган.

Җомгадан, 2 февральдән, бирле Казанда 10 миллиметр күләмендә явым-төшем күзәтелгән, бу – айлык норманың дүрттән бере. Өч көн эчендә шәһәр урамнарыннан – 100 мең тонна, ел башыннан алып 1,2 миллион тоннадан артык кар чыгарылган.

Сәхифәләр

Илсур Метшин: «Буран» планы тәмамланды, әмма буран гына бу хакта белми