Илсур Һадиуллин: Яңа электрон көндәлектә билгеләрне 21 көн эчендә төзәтеп була
Министр сүзләренчә, агымдагы уку елында чирек билгеләре, контроль эш нәтиҗәләре аерым исәпкә алынмыйча, уртача билге буенча чыгачак.
Татарстанның мәгариф һәм фән министры Илсур Һадиуллин 9 гыйнварда кертелгән яңа электрон көндәлектә билгеләрне 21 көн эчендә төзәтеп булуын белдерде.
«Хәзер электрон көндәлектә укытучы начар билгене 21 көн эчендә төзәтә ала», – диде министр ТР Хөкүмәт йортында узган брифингта.
Татарстан мәктәпләре быелдан яңартылган «Татарстан Республикасы электрон мәгарифе» мәгълүмат системасына күчте. Социаль челтәрләрдә яңа көндәлектә билгене төзәтеп булмаячак, дигән мәгълүмат таралды.
Илсур Һадиуллин сүзләренчә, агымдагы уку елында чирек билгеләре уртача билге буенча чыгачак. «Киләсе уку елыннан контроль эшләр өчен куелган билгеләр чирек нәтиҗәләрендә зуррак көчкә ия булачак. Быел бу үзенчәлекне техник яктан кертергә җитешмәдек», – диде ул.