Илшат Әминов татар теленнән дәреслекләрне лицензияләү мәсьәләсен күтәрде
Комитет рәисе Разил Вәлиев бу мәсьәләнең актуаль булуын, бу уңайдан ата-аналар да, укытучылар да еш мөрәҗәгать итүен әйтте.
(Казан, 18 сентябрь, “Татар-информ”, Гөлнар Гарифуллина). Татарстан Дәүләт Советы депутаты Илшат Әминов татар теленнән дәреслекләрне һәм уку кулланмаларын лицензияләү мәсьәләсенә игътибарны юнәлтте. Бу хакта ул бүген парламентның Мәгариф, мәдәният, фән һәм милли мәсьәләләр комитеты утырышында әйтте.
“Бу өлкәдә проблема бар”, – дип Илшат Әминов бу дәреслекләрнең закон тарафыннан танылган, хокукый булуы өчен җентекләп уйларга кирәклеген белдерде. Аның әйтүенчә, дәреслекләрнең лицензияләнүенә тизрәк ирешү өчен, бу мәсьәләне нечкәлекләренә кадәр карау зарур.
Комитет рәисе Разил Вәлиев бу мәсьәләнең актуаль булуын, бу уңайдан ата-аналар да, укытучылар да еш мөрәҗәгать итүен әйтте.
