Илсөя Бәдретдинова татар телен белгән кеше аны башкаларга да өйрәтергә тиеш дип саный
Татар теленең "текә" тел икәнен яшьләргә өйрәтергә кирәк, ди җырчы.
(Казан, 21 февраль, "Татар-информ"). Татар эстрадасы җырчысы Илсөя Бәдретдинова туган телен камил белгән кеше аны башкаларга да өйрәтергә тырышырга тиеш дип саный. "Бигрәк тә үз милләтеңдә булган, үз телен белми торган кешеләргә өйрәтергә кирәк", - диде ул "Татар-информ" хәбәрчесенә.
"Минем төркемдә 7 милләт вәкиле эшли. Һәм алар, каян булуларына карамастан - Сириядәнме, Африкаданмы, Якутиядәнме - барысы да минем белән татарча исәнләшә. “Илсөя апа, исәнмесез!”, “Рәхмәт!”, “Хәерле кич!” диләр. Бу минем таләп. Алар Татарстан җирлегендә яши, татар милләтенә концертлар куеп йөри: димәк, безнең телне ихтирам итәргә тиешләр, мөмкин кадәр үзләштерергә тиешләр”, - дип аңлатты Илсөя Бәдретдинова.
Татар теленең "текә" тел икәнен яшьләргә өйрәтергә кирәк, ди ул. "Күпме генә сүкмәсеннәр, беренче чиратта, телне саклый торган нәрсә – ул татар эстрадасы, концертлар. Бүгенге көндә татар эстрадасында күп төрле юнәлешләр бар. Һәм гомерендә татарча белмәгән яшьләр әкренләп татар эстрадасына тартыла башлады”, - дип фикерләре белән уртаклашты Илсөя Бәдретдинова.
- 21 февраль Халыкара туган тел көне билгеләп үтелә.