Илгиз Зәйниев куйган «Анам кыры» спектакле «Алтын битлек» театр премиясенә дәгъва кыла
Скопировать ссылку
«Әкият» курчак театрында Илгиз Зәйниевнең Чыңгыз Айтматов әсәре буенча куелган «Материнское поле»/«Анам кыры» спектакле «Алтын битлек» театр премиясенә дәгъва итә. Исемлек «Алтын битлек» театр премиясенең рәсми чыганакларында урын алган.
Бу Татарстан театрларыннан номинантлар арасына кергән бердәнбер спектакль.
- «Дипломантлар» исемлегендә Татарстаннан ике спектакль бар – М.Җәлил исемендәге Татар дәүләт опера һәм балет театрының «Кармен» һәм «Лебединое озеро» спектакльләре.
- Оештыручылар хәбәр итүенчә, 454 театрдан барлыгы 789 әсәр тәкъдим ителеп, 671е бәйгедә катнашкан.
- «Анам кыры» – театрның үткән сезондагы беренче премьерасы иде.
- «Анам кыры» - совет халкының гимнына тиң әсәр, гаиләләр һәм хатын-кызлар тарихы. Сугышта ирен һәм өч улын югалткан Толгоной кырга чыгып Җир-анага кайгысын сөйли, хатирәләр белән уртаклаша, үзен борчыган сорауларны куя», – дип билгеләп үтә матбугат үзәге.
- Спектакльне театрның сәнгать җитәкчесе Илгиз Зәйниев сәхнәләштергән. Куючы рәссам – Сергей Рябинин. Композитор – Миләүшә Хәйруллина. Яктыртучы рәссам - Михаил Кирильцев.
- «Әкият» курчак театрында Илгиз Зәйниев куйган «Авиатор» курчак спектакле өч номинациядә «Алтын битлек»кә ия булган иде.