Илфир Якупов: Камал театрының иске бинасында спектакльләр куймаячакбыз
Галиәсгар Камал исемендәге Татар дәүләт академия театры директоры Илфир Якупов яңа бинага күченгәч, театрның иске бинасында спектакль куймаячакларын әйтте.
«Театрның иске бинасында да уйнап булмас, чөнки яңа бинада зур мөмкинлекләр бар. Яңа бинага күчү – бер тарих булыр. Тиз генә күчеп булмас. Без күченеп чыгып китүгә ияләнгән, чөнки гастрольләргә йөреп торабыз. Яңа бинаның һәр залына (барлыгы дүрт зал) елына өчәр премьера ясасак, театр өч-биш елдан соң тулы куәткә эшли башлаячак. Һәр залда премьералар куярга исәплибез. Яңа бинага күченүебез турында аерым матбугат конференциясен үткәрербез әле», - диде театр директоры «Татар-информ» мәгълүмат агентлыгында оештырылган матбугат очрашуында.