Илдар Халиков француз Ассоциациясе Evolen белән хезмәттәшлек юнәлешләрен тикшерде
Ассоциация үз эченә нефть һәм газ өлкәсендәге фәнни һәм эшмәкәрлек берләшмәләрен туплаган.
(Казан, 31 гыйнвар, “Татар-информ”). Бүген Хөкүмәт Йортында Татарстан Премьер-министры Илдар Халиков француз Ассоциациясе Evolenның вәкилләре белән очрашты. Ассоциация үз эченә нефть һәм газ өлкәсендәге фәнни һәм эшмәкәрлек берләшмәләрен туплый.
Ассоциациянең генераль директоры Жерар Момплот һәм Россидә Evolen проектлары буенча директор Владимир Живушкин бу көннәрдә Казанга эшлекле сәфәрләре белән килде, дип хәбәр ителә Татарстан Республикасы Президенты матбугат хезмәтендә.
Илдар Халиков Франция Татарстанның күптәнге һәм ышанычлы партнеры дип, искәртте. Француз компанияләре республика икътисадына инвестицияләрне актив кертә. Моннан тыш, соңгы елларда Татарстан һәм Франция арасында үзара элемтәләр артты, дип өстәде ул.
Шулай ук очрашуда алга таба хезмәттәшлек турында сорауларга карата да фикер алышу булды.