Илдә алюминий эшкәртүдә алдынгы ТАТПРОФ компаниясе эшмәкәрләрне хезмәттәшлеккә чакыра

Россия базарында экструзия алымы белән алюминий эшкәртү лидеры булган ТАТПРОФ компаниясе бизнесларны үстерү программасын башлап җибәрә. Бу хакта «Татар-информ» мәгълүмат агентлыгында матбугат конференциясендә ТАТПРОФ генераль директорының инновацияләр буенча урынбасары Евгений Рачков сөйләде.

Генераль директор Сергей Рачков җитәкчелегендәге ТАТПРОФ компаниясе яңа эшчәнлек юнәлешенә әзер булган эшкуарларга төрле яклап ярдәм күрсәтү максатын куя. Алюминий профиленнән продукция җитештерүне күздә тоткан иң яхшы проектларга теләктәшлек күрсәтеләчәк. Бу проектның импортны алмаштыруда да әһәмияте зур, чөнки чит ил капиталы белән күп кенә җитештерүче компанияләр үз эшен туктата.

Төзелеш, автомобиль төзү, агросәнәгать өлкәсе, нефть сәнәгате, энергетика тармагы, йорт җиһазлары ясау, яктырту һәм башка өлкәләр өчен эшләнмәләр җитештерү проектлары каралачак. Компания мәйданнарны арендага алу, производство куәтләрен арттыру, технологик бухгалтерлык, икътисади, юридик ярдәм, сату-алуларны оештыруда консалтинг кебек ярдәм күрсәтергә әзер. Хәзерге вакытта РФ Алюминий ассоциациясе дә проектны хуплавы турында белдергән.

«Безнең бурыч – кызыксынган эшмәкәрләрне табу һәм алар белән бизнес кору. ТАТПРОФ компаниясе белгечләре металлургия, алюминий өлкәсендә яхшы экспертлар, ләкин без һәр өлкәдә эксперт була алмыйбыз. Шуңа күрә без башка өлкәләрдә экспертизасы булган, үз эшен алюминий продукциясе белән бәйли алырлык, старт алырга әзер торырлык экспертларны эзлибез», - диде Евгений Рачков.  

Проект федераль дәрәҗәдә Россиянең барлык төбәкләрендә гамәлгә ашырылачак. Татарстан компанияләреннән тыш, Мәскәү, Санкт-Петербург, Идел буе, Урал федераль округлары, Түбән Новгород өлкәсе компанияләреннән проектлар көтеп калалар.

Претендентлар компания вәкилләре белән онлайн һәм офлайн очрашуларда катнаша алачак. Проектка 2022 елның августында йомгак ясалачак. Проектларны сайлап алу һәм катнашу процедурасы турында тулырак start.tatprof.ru сайтында белергә мөмкин.

ТАТПРОФ производствосы Яр Чаллыда урнашкан. 1990 елда ачылган компаниядә 2021 ел нәтиҗәләре буенча җитештерү күләмнәре 50 мең тоннадан артык. Бүген компания Россия алюминий профильләре базарының 20 процентын биләп тора.

Җитештерү куәтләре – тәүлегенә 180 тонна профиль. Алюминий профиленең 10 меңнән артык төре чыгарыла. Нигездә, бу продукцияне төзүчеләр, фасад, тәрәзә, ишекләр ясау белән шөгыльләнүчеләр куллана. Шулай ук, халык кулланышындагы товарлар – баскычлар, радиаторлар да алюминийдан ясала.

Компания продукциясе зур гына төзелеш проектларында файдаланылган. Казанда 2013 елгы Универсиада объектлары, Сочида Олимпия паркында Зур боз сарае, «Самара Арена», «Лужники», «Газпром Арена» стадионнары, Казандагы Теннис академиясе, торак комплекслар, эшлекле объектлар, производство биналары төзелешендә ТАТПРОФ металлоконструкцияләре кулланылган.