Илһам Шакировка багышланган җеназа намазын Мәрҗани мәчетендә Камил хәзрәт Сәмигуллин укыды
Бөек җырчыны соңгы юлга озатырга дип мәчеткә бик күп халык килгән иде.
(Казан, 18 гыйнвар, “Татар-информ”, Марат Мөбарәкшин). Бүген Татарстан мөфтие Камил хәзрәт Сәмигуллин Казанның “Әл-Мәрҗани Җәмигъ” мәчетендә Илһам Шакировка багышланган җеназа намазын укыды.
“Без бүген Илһам Шакировның җеназа намазына җыелдык. Кешенең никадәр бөек булуы аның хәтта шушы намазга күпме халык килүеннән дә күренә”, – диде Татарстанның баш казые Җәлил хәзрәт Фазлыев.
Илһам Шакировны соңгы юлга озатырга дип мәчеткә бик күп халык килгән. Алар арасыннан дин әһелләреннән - Татарстан мөфтие Камил Сәмигуллин, баш казый Җәлил Фазлыев, мөфтинең беренче урынбасары Рөстәм Вәлиуллин, мөфтинең уку-укыту буенча урынбасары Рафик Мөхәммәтшин да катнашты.
Килгән халык арасында күренекле җырчылар, театр артистлары да бар иде.
- Татар халкының легендар җырчысы Илһам Шакиров бүген Яңа татар бистәсе зиратының үзәк юлында җирләнде.