Икътисад 26 июль 2024 09:29

Россиядә 1 августтан шәхси йортлар төзү кыйммәтләнә

Скопировать ссылку

1 августтан шәхси йорт төзү 5-10 процентка кыйммәтрәк булачак. Бу хакта «Прайм» агентлыгы Дәүләт идарә университетының икътисад һәм финанслар институты директоры, профессор Галина Сорокинага сылтама белән хәбәр итә.

Моның сәбәбе шунда ки, 1 августтан «яшел» шәхси торак төзелешенең яңа илкүләм стандарты гамәлгә керәчәк. Яңа стандартка 45 критерийны кертәчәкләр, алар 8 категориягә (архитектура, участокны оештыру һәм аның экологик иминлеге, инфраструктурасы; төзелешне оештыру һәм аның белән идарә итү) берләштереләчәк. Шулай ук эчке мохитнең уңайлылыгын һәм сыйфатын, энергия нәтиҗәлелеген һәм атмосфераны, инжиниринг, төзекләндерү һәм калдыкларны утильләштерүне дә бәяли башлаячаклар.

Яңа стандартлар шәхси торак төзелешенә гаилә ипотекасы бирү күләме арту сәбәпле кертелде. Аның ярдәмендә клиентларны һәм банкларны төзүчеләрнең сыйфатсыз хезмәтләреннән якларга телиләр. Эксперт сүзләренчә, хәзерге вакытта төзүчеләр «үтәргәме-юкмы» дигән карарны ирекле рәвештә кабул итә. Яңа нормалар үз көченә кергәч, аларга бу кагыйдәләрне мәҗбүри рәвештә үтәргә туры киләчәк.

Сорокина билгеләп үткәнчә, төзелеш эшләре кыйммәткәрәк төшсә дә, алга таба эксплуатация вакытында чыгымнарны янга калдыру сизелерлек (50-60 процент) булачак. Базардан шулай ук өйләрне арзанлы һәм сыйфатсыз материаллардан төзүче намуссыз төзелеш компанияләре дә китәчәк.

Искәртеп узабыз, соңгы ике атнада яңартылган «Гаилә ипотекасы» дәүләт программасы буенча эскроу-счетлар белән шәхси торак төзелешенә сорау ике тапкыр артты. Өстәвенә, Татарстан әлеге программага карата кызыксыну иң югары булган төбәкләр арасына керде.

Сәхифәләр

Россиядә 1 августтан шәхси йортлар төзү кыйммәтләнә